ဂျပန်လို “CV Form” မှန်မှန်ကန်ကန် ရေးသားနည်း 

ဂျပန်မှာအလုပ်လျှောက်မယ့်သူတိုင်း သိကိုသိထားသင့်တဲ့ “ CV Form” ရေးနည်းကို အသေးစိတ်မျှဝေလိုက်ပါတယ်

ဂျပန်နိုင်ငံမှာ တစ်နိုင်ငံလုံးသုံး CV Form Format ရှိပါတယ်။ တချို့ကုမ္ပဏီတွေအပေါ်မူတည်ပြီး ကွာခြားမှုအနည်းငယ်ပဲရှိပါတယ်။ တော်တော်များများက ဒီ CV Form Format ကိုပဲ လက်ခံကြပါတယ်။ ဒါ့ကြောင့် ဂျပန်လို “ CV Form” ကို မှန်မှန်ကန်ကန်နဲ့ရေးတတ်အောင် အသေးစိတ်ဖတ်ရှုလိုက်ပါ။

To Download Japan CV Form Format : https://bit.ly/JapanCVForm

၁။ နေ့စွဲ

——-

အလုပ်လျှောက်မယ့်နေ့/CV Form ပေးပို့မယ့်နေ့ကို ဖြည့်ရပါမယ်။

၂။ ဓာတ်ပုံ

———-

(3.6~4 cm x 2.4~3cm) Size

(၃) လအတွင်းရိုက်ကူးထားတဲ့ဓာတ်ပုံဖြစ်ရပါမယ်။ အလုပ်ကောင်းရဖို့ ဓါတ်ပုံသေချာရိုက်ပြီး ကပ်သင့်ပါတယ်။

၃။ ၄။ ကိုယ်ရေးအချက်အလက်

——————————

နာမည်ကို Katakana နဲ့ English လို (၂) မျိုးလုံးရေးရမှာဖြစ်ပါတယ်။ နာမည်ရေးတဲ့အခါ ပုံမှန် Size ထက် နဲနဲပိုကြီးပြီး ထင်ထင်ရှားရှားရေးရပါမယ်။ ဂျပန်ရောက်မြန်မာများအနေနဲ့ နေထိုင်ခွင့်ကဒ် (ဇိုင်းလျူးကဒ်) ကနာမည်အတိုင်းဖြည့်ဖို့လိုပါတယ်။

ကျန်တဲ့မွေးသက္ကရာဇ်၊ ကျား/မ နဲ့ လိပ်စာအပြည့်အစုံကို ရေးပေးရပါမယ်။

၅။ ဖုန်းနံပါတ်

————

လက်ရှိအသုံးပြုနေတဲ့ ဖုန်းနံပါတ်ကို ရေးရပါမယ်။

၆။ ပညာအရည်အချင်း

———————

အထက်တန်းကစပြီး မိမိတက်ခဲ့ဖူးတဲ့ ကျောင်း၊ တက္ကသိုလ်၊ တက်ရောက်နေဆဲကျောင်းများနဲ့ လေ့လာခဲ့တဲ့ဘာသာရပ်များကို ခုနှစ်၊ လအစဥ်လိုက်ရေးပေးရပါမယ်။

၇။ လုပ်ငန်းအတွေ့အကြုံ

———————–

အလုပ်သင်၊ အချိန်ပိုင်းအလုပ်၊ အမြဲတမ်းဝန်ထမ်းအလုပ်စတဲ့မိမိလုပ်ခဲ့ဖူးတဲ့ ကုမ္ပဏီအမည်နဲ့ ရာထူးစတဲ့အချက်တွေကို ခုနှစ်၊ လ အစဥ်လိုက်ရေးပေးရပါမယ်။ အလုပ်မှာရာထူးတိုးရှိခဲ့ရင်လည်း တိုးခဲ့တဲ့ခုနှစ်၊ ရာထူးအမည်၊ ပြောင်းတဲ့ဌာနအမည်စတာတွေကို ဖြည့်ပေးဖို့လိုပါတယ်။

၈။ ဘာသာစကားနှင့်အခြားအောင်လက်မှတ်များ

———————————————-

ဂျပန်စာအောင်လက်မှတ်၊ အလုပ်နဲ့သက်ဆိုင်မယ့်အရည်အချင်းအောင်လက်မှတ်၊ ကားမောင်းလိုင်စင်စတဲ့တခြားအောင်လက်မှတ်တွေကိုလည်း ရေးပေးရပါမယ်။

၉။ Applied Reason, Personality, Marital Status

—————————–

ဒီအလုပ်ကိုလျှောက်ထားလိုတဲ့ရည်ရွယ်ချက်၊ မိမိရဲ့အားသာချက် အားနည်းချက်၊ ဝါသနာ၊ ဒီကုမ္ပဏီကိုသဘောကျတဲ့အချက်တွေ၊ မိမိအနေနဲ့ဒီအလုပ်မှာဘယ်လိုအကျိုးပြုမယ်၊ ဒီအလုပ်နဲ့ ကိုက်ညီတဲ့မိမိရဲ့အရည်အချင်းစတဲ့အချက်တွေကို သေချာရေးပေးဖို့လိုပါတယ်။ အိမ်ထောင်ရှိ/မရှိ၊ ကလေးရှိ/မရှိနဲ့ ထောက်ပံ့နေရသူရှိ/မရှိကိုပါ ရေးပေးရပါမယ်။

၁၀။ မျှော်မှန်းသည့်အချက်

————————–

မိမိမျှော်မှန်းထားတဲ့အလုပ်နေရာ၊ ရာထူး၊ လစာနဲ့ အလုပ်ချိန်တွေကို ဖော်ပြပေးရပါမယ်။

မှတ်ချက်။ လက်ရေးနဲ့ဖြည့်မယ်ဆိုရင် မင်အမဲကိုသာသုံးရပါမယ်။ မင်စိုသုံးလို့မရပါ။ Mail နဲ့လျှောက်ထားတဲ့အခါ PDF File ကို Attach လုပ်ပြီး လျှောက်ထားရပါမယ်။